دووری

گەر وارانوو یادو تۆ

جە دامانوو

وشکایی دڵیمەنە نەوارۆنە

رەگ و دارو وەشەویسی

سیس بۆنە و

چرۆ عەشقیما مەوشیۆ

ئازیزەکەم

تۆ ئا هەورە خەیاڵیەنی

کە هیچ مەرزێوە مەشناسی و

گولەو تفەنگو

هیچ قەرەوڵێوە

مەتاوۆ

پابڕت کەرۆ

گیانە!

پەپوولە ئاسا چەمەڕاو وەهاریەنا

پەی

ڕەمناو تەمەو

زمسانی و

وڕناو دیوارو جیایی

چا رووە

جیاتا ئاستەنا و

ویرەوەری

رەنگەو

فەرامۆشیش

وەنەنیشتەن

چەنەتا تووڕەنا

ئایەنەی مێڕیا

وەیوەۆ زمسانی

تارای چەرمە و هارەقوو شەرمی

چک! چک!

چەمەڕاو زەمای ئەوەرازیا

ئاسمان گۆرانییە و

زەمین چەپڵە رێزان

پەی هۆرپڕاو گوڵە هەرزەکارەکا و

زەماونەو بێ وادەیی

ئیتر !

نە بادە بادە !

نە شاباش و شادیانە

تەنیا چێوێ

شۆنیش مەنۆ

هەرسەو چەماو

پاوەیوێنە

قەدو شیشەی

ئایەنەی مێڕیا

18_10_82

هەتیمی

دامنەو شێعرێنە

جە ئەدای بیەنا

بابۆَم

ویرێویی ئەهووراییا

پێیم گرتێ و

گۆَم کەرد

ئەدام مۆموو

عومریش تاویاوە!

بووڵگانە

گەمە کەرێنێ

پەپوولێوە چرپناش گۆشمەرە

ئانە تاتەتا !

نیمە گیانێوەش بێ و

ئایچ ....?!

وەرم

بەلەموو خەیاڵی

گرتەنا کۆڵێوە

سەفەرێوی دوور و درێژ

تا

ئۆقیانووسو حەزی

چی دنیەنە

گرد چێو

پێسە روومەتوو ئەدایم

پاک و بێ گەردا

ماساوە کێ ئاویی لێڵە مەکەرا

ئادێ

ئەداشا ئاویەنە

و مەردەیشا پەی نیا؟!

زویری

زویرەنا

گڕو تاسەیم

جە زیندان و غوربەتیەنە ئەسیرا

بێزار

پێسە سیروانی

ئاوەختە سەرەو وێش

هۆرگێر ولامەکەرۆوە

نا نا

تو خوا

وەرم مەگێردێ

با لافاوەو تووڕەییم

پەنگە نەوەرۆوە

من چێگە نامۆنا

دروێ مدا ؟!

ئینە وڵاتوو من نیا

نە بەژن و باڵاش

نە دیمەن و دەنگ و رەنگش

من کوڕو وەروێنا

بەرز و شۆخ و شەنگ

پێسە شاهۆی

گرد روێ دەسەملو سیاچەمانە و

گرەوەو شێعرێ بێنی

زویرەنا

چی دلێ سیاواینە

چەمێم مەکریاوە

من چێرو سیبەرو دار هەناری و

بنکڵیشو ئارگاو یانە باخێوی دڵتەڕ

گەورە بیەنا

دڵداری سوورە هەراڵە و چنوور و بۆژانە و

بەرزەلنگ و وەرکەمەر

هەناسەم سەوز کەرۆ

نا ! نا !

بازدێم

با جارێتەر

دلێ ساباتوو

کەما و لۆ و بەناینە

بووەو زێدیم

کەروو ؟