نویسته‌ی به‌ زڤانوو ویتا ‌ شه‌ره‌فا په‌یتا

 

گردیما  مزانمی  که زڤان  جه  دیدی  ئه‌کادیمیۆ، یان  پێناسه‌  زانستیه‌‌که یشۆ به‌ وه‌سیلیڤی په‌یڤه‌ندی( کومونیکاسیون) په‌ی  ئه‌نه‌یاوای مه‌ردمی جه  یوترینی  و وسته‌ ڕاو  کاره‌کاو روژانه‌یشا وه‌سفکریان. به‌ڵام چیگه‌نه‌ هه‌ر که‌س زڤانوو ویش به‌کار بارو بریڤ ئیمتیازی خاسی هورگیرو. یوشا ئانه‌نه‌ مافیڤی سونه‌تیش به‌ گا ئاڤرده‌ن ، یوته‌ریچشا شه‌ره‌فیڤا په‌ی  ئا  تاکیه‌ که‌  پا  زڤانوو  ویشه‌ منڤیسو و هه‌م وه‌فادارییویچا په‌ی نه‌وه‌‌کا، یان جیلوو دمایی  هورگیراو ئا زڤانیه‌.

 

زڤانوو هۆرامی  جه‌ تاریخه‌نه‌‌ لاپه‌ری  فریش نه‌خشنێنی،  هه‌م  پسه‌  زڤانی ئیداری  و هه‌م پسه‌ زڤانی ئه‌ده‌بی. هه‌ر  جه‌  سه‌رده‌موو   ساسانیه‌کاڤه‌ گیره‌ش  هه‌تا سه‌رده‌موو ئه‌رده‌ڵانیه‌کا ئی زڤانه‌ بره‌ڤیڤی فره‌ش بیه‌ن. به‌ڵام   به‌داخۆ  چی  چه‌رخه‌ تازه‌نه‌ به‌ سه‌به‌بوو فاکته‌ره‌ سیاسی و کۆمه‌ڵایه‌تیه‌کاڤه‌  که‌میڤ پشتگو  ڤزیان  و  رۆشنفکروو هۆرامیچ  ته‌ئسیریڤی فه‌وقه‌لعاده‌ش ڤه‌نه‌ کریان ، که‌ هه‌میشه‌  به‌داخۆ  پا  زڤانیه‌ منڤیسو  که‌ ئارو  ده‌سه‌ڵاتش هه‌ن.  هه‌رپاسه‌ ڤینمی  که‌  رۆژنامی و کتیبی و ڤه‌ڵا کریا کوردیه‌کی فره‌ته‌ر ته‌نیا به‌ (زڤانی) حاکم  که‌ ده‌سه‌ڵاتش هه‌ن  منڤیسیا.

 

به‌ په‌ی لڤاو من ، مادام  ئارو  که‌شووهه‌ڤێڤی( دیموکراتی) هه‌ن جه‌ کوردستانه‌نه‌، مشوم روشنفکروو هۆرامانی ئا  ته‌لیسمی ماڕو،  په‌ی ئینه‌یه‌ هانده‌ریڤ بو په‌ی ته‌ماموو نووسه‌ره‌کا ته‌ری هۆرامی، تا ده‌س بدا قه‌ڵه‌م و به‌ زڤان و ویشا بنڤیسا هه‌تا زڤانه  قه‌دیمیه‌‌که‌شا  که‌  ڕیشه‌و زڤانه‌ کوردیه‌کان، بێڤه‌‌‌ سه‌رو کاغه‌زی و   جه‌  مێدان و ئه‌ده‌ب و فه‌رهه‌نگیه‌نه‌ هه‌ر پیسه‌  دۆرانوو سه‌یدی و مۆله‌وی و بیسارانی و هتد... بتاڤو میدان داری که‌رو.

 شه‌خسیه‌تو گرد  قۆم  و  نه‌ژاد و میلله‌تیڤی ئینا پا زڤانیشۆ که‌ قسیش په‌نه‌ که‌رو، که‌  فه‌رهه‌نگه‌که‌و ویش پا زڤانیه‌ مشناسو به‌خه‌ڵکی‌ته‌ری ، پۆکه‌ی ئیمه‌ی هۆرامی زڤان مشوم ئا شه‌ره‌فیه‌ ده‌یمێ ویما و ده‌س که‌رمی به‌ نویسته‌ی و کیانمیش په‌ی میدیا کوردیه‌کا.

پا هیوانا ئادیچی ‌ باوشیڤه‌ی وه‌ڵاش په‌ی که‌راڤه‌، هه‌تا فه‌رهه‌نگی کوردی ره‌ونه‌قته‌ر برمانو، چوونکه‌ راسه‌کیش گوش نه‌دای به‌ زڤانی هۆرامی فه‌رهه‌نگوو کوردیش په‌نه‌ زاییف بو.

به‌یدێ !  با به‌ هۆرامیانه‌ بنڤیسمی چوونکه‌ پسه‌ شاعیر فه‌رماڤو ( به‌ زڤانوو وی نویسته‌ی ڕیزوو وی گرته‌یا).

 

هورامان عبدولره‌حمان

2007-05-28