به‌شۆ که‌رده‌ی
فه‌یسبوکه‌نه‌ به‌شش که‌رۆ
یانه‌ رؤچنه وه‌رته‌سک که‌رده‌و ره‌سه‌نیه‌تو زوانی هه‌ورامی به‌ ماچۆ ئه‌نفال که‌ری فه‌رهه‌نگو هه‌ورامین

وه‌رته‌سک که‌رده‌و ره‌سه‌نیه‌تو زوانی هه‌ورامی به‌ ماچۆ ئه‌نفال که‌ری فه‌رهه‌نگو هه‌ورامین

هاموڵاتیه‌وه‌شه‌ویسه‌کا فره‌ سه‌خت و دژوار قه‌بووڵ کریۆ که‌ بڕێوه ‌مامه‌ڵه‌گه‌ر و سه‌ۆداکاری گه‌ره‌کشابۆ ره‌سه‌نیه‌ت و پێناسه‌و فه‌رهه‌نگیت که‌ زۆانا پاشێلی و بێ حۆرمه‌تیش سه‌ره‌ۆ کریۆ چ به‌ ئینکار و سریه‌ییوه‌ یان جه‌ بازارو ده‌سه‌ڵاتێوی سیاسیه‌نه‌‌ هه‌وڵو هه‌راج که‌رده‌یش دریۆ !جه‌ هه‌قێقه‌ته‌نه‌ ئینه‌ به‌ گه‌وره‌ترین چه‌ته‌یی زانستی و ده‌سکه‌وته مێژووییه‌کاو مرۆڤی ئه‌ژمار کریۆ

 چوون فه‌وتناو زوانی وه‌راوه‌را چه‌نی مه‌رگو فه‌رهه‌نگی که‌ فه‌رهه‌نگ بێ ئاسه‌وارکریا مه‌رگو میلله‌تێوه‌ش گنۆشۆنی و به‌ به‌رئاوه‌ردو زانستو سه‌رده‌می به‌ پاکتاوی نه‌ته‌وه‌یی یان ژینوساید ته‌فسیر کریۆ ! به‌ڵام چێش که‌روو به‌ڵام هامرازه‌ن،،، فه‌ڵه‌ک که‌ڵه‌کچین چه‌نیم که‌جبازه‌ن. من مه‌زانوو مه‌به‌ستو ئی گێه‌ره‌ شێونا چی هه‌ڵۆێست گرته‌یه‌ چێشا ؟ ئایا ژیوناێه‌و فه‌رهه‌نگو هه‌ورامانی که‌لێنه‌کاو ده‌سه‌ڵاتی > سیاسی ، ئابووری ، کۆمه‌ڵایه‌تی و نه‌ته‌وه‌ییشا > فراوانته‌ر له‌نگ و له‌ق که‌رۆ ؟ ئایا خه‌ڵکو هه‌ورامانی به‌ داگیرکار و به‌شه‌وه‌ره‌ مزانا ؟ ئایا جه‌ وشیاری و زانست و هۆرسووریایی و کارامه‌ییش ته‌رسا یا خۆ به‌ بێ وه‌فایی و جه‌فاکاری حازرێ نیه‌نێ وه‌ڵاموو ئه‌رک و خزمه‌تگۆزاری فه‌رهه‌نگی و نیشتمانپه‌روه‌ری ئی خه‌ڵکه‌ زه‌حمه‌تکێشی بداۆه‌ ؟ به‌ بریارو خاوه‌ن نه‌زه‌را هه‌ر ئینسان یان قه‌ومێوه‌ نرخ و رێزش جه‌ فه‌رهه‌نگو وێش نه‌گرت ئیخلاق و په‌روه‌ردێوی سالمش نیا چوون زوان ریشه‌و که‌سایه‌تی و کاراکترو ئینسانیا و هۆکارو سه‌رکه‌وته‌ی و گه‌شه‌ سانای کۆمه‌ڵگاین ، ئایا ئی حه‌زه‌راتی تا ئیسه‌ چ زخمه‌تیوه‌شا پیی فه‌رهه‌نگی که‌رده‌ن ئیلا ئانه‌ نه‌ بۆ سالانه‌ به‌ درۆشمێوی بێ ناوه‌خن کۆنسرتێوی هۆرپرای و گۆرانیی سازنا به‌نامێ > دزی واڵو هه‌ورامانی > په‌ی سڕکه‌رده‌ی و سه‌م پاشی زامه‌کاو ئه‌نفال و کیمیاوارانو هه‌ڵه‌بجه‌ی شه‌هیدی که‌ ئیلا سه‌رگه‌رمی و جه‌ خشته‌ به‌ردی فیکر و زه‌ینیه‌تو خه‌ڵکو هه‌ورامانی نه‌بۆ هیج سودێوی مه‌عنه‌وی و مه‌ده‌نی و فه‌رهه‌نگی به‌ خه‌ڵکو بێ ده‌رتان و به‌ش مه‌ینه‌تو هه‌ورامانی مه‌یاونۆ !   جه‌ خیر و به‌ره‌که‌تو ده‌سه‌ڵاتو هه‌رێمی تا ئیسه‌ نه‌ فه‌رهه‌نگ لۆغه‌تێوه‌ما هه‌ن نه‌ ڕێنوسێ و نه‌ رۆژنامه‌ و نه‌ ده‌زگاییوه‌ گشتی ئیعلامی باسوو بنکه‌و په‌روه‌رده‌ی پێسه‌و مه‌دره‌سه‌ی سه‌ره‌تایی و به‌ فه‌رمی ئه‌ژناسای زوانو هه‌ورامی لاو ژیلله‌و مه‌ڕی >په‌رلمانو کوردستانی > به‌ کۆفروئیبلیسی یا وڕنای کابه‌ی ده‌سنیشان کریۆ ! پێویستا به‌ هه‌مان شێوه‌ که‌ خزمه‌ت به‌ زوانو دۆژمناو کوردی کریۆ > کۆماروئیسلامی ئێرانی و ده‌سه‌ڵاتو دیکتاورو تۆرکی ‌ سه‌رو بودجه‌و حکومه‌تی هه‌رێمی جه‌ مه‌دره‌سه‌   تا زانکۆ و سه‌رجه‌م پێداویستیه‌کا   وه‌راوه‌ر به‌ نیازه‌ فه‌رهه‌نگیه‌کاو خه‌ڵکو هه‌ورامانی به‌رپرسیاری ئیخلاقی و فه‌رهه‌نگی و نیشتمانی وێشا پارێزنا   جه‌ حاڵێوه‌نه‌ یه‌ک مه‌دره‌سه‌ی هه‌ورامی جه‌ باشوره‌نه‌ وجودش نییا ئایا هه‌ورامی و ئاشوری و کلدانی و یه‌زیدی و سۆرانی و بادینی چ جیاوازیوه‌شا هه‌ن ؟ ئایا پرۆفیسوره‌ زوان ناسه‌کاو وه‌زاره‌تو په‌روه‌رده‌ی و حه‌مورابیه‌کاو په‌رلمانی و مارتین لۆتیره‌ دیموکراسی خۆازه‌کاو هه‌رێمو کوردستانی تا که‌ی ویژدانشا وه‌راوه‌ر پیی بێ عه‌داڵه‌تیه‌ کۆمه‌ڵایه‌تی و فه‌رهه‌نگیه‌ مه‌چڵاکێۆره‌ ؟ تۆ واچی تا ئیسه‌ ئاوه‌زشا پینه‌یه‌ نه‌مه‌ڕیابۆ که‌ زوان یانی په‌یوه‌ندی ئینسان و مێژووی ، زوان سه‌رچه‌مه‌و زانست و مه‌عریفه‌ و فێربێه‌ی و په‌یوه‌ندین چه‌نی ژینگه‌ی و گه‌وره‌ترین کۆڵه‌کێ سه‌قامگیری فه‌رهه‌نگو کۆمه‌ڵگاین ، زوان فیکر و مه‌ده‌نیه‌ت و سیاسه‌ت و رۆشنویرین ، لاساری و وێ گێلکه‌رده‌ی چی گه‌وهه‌ره‌ ئینسانیه‌ یانی نابودکه‌رده‌ی و وێرانکه‌رده‌ی فه‌رهه‌نگو کورده‌واری ، پرسیار ئینه‌ن ئایا ئی ئه‌ده‌ب دۆساو و لۆقمانه‌حه‌کیماو هه‌ورامانی چی مه‌سڵه‌حه‌تو سیاسی و به‌رژه‌وه‌ندیه‌کاشا چه‌ربنا سه‌رو فه‌رهه‌نگو هه‌ورامانیه‌ره‌ ؟ ئایا چیی هه‌روه‌خت باس جه‌ زوانو هه‌ورامی کریۆ یاوو له‌رز گێرۆشا و نه‌هه‌ێ فه‌رهه‌نگیشا گنۆ و جه‌ گه‌رماو شاره‌زوریه‌نه‌ تووشو سه‌یبه‌رۆی با و زوانشا جه‌ گۆ گنۆ و هه‌ورامی بۆ به‌ ماچۆ ؟؟؟؟؟ ئه‌گه‌ر به‌ڵگه‌ و شێوه‌ خه‌ت و دیکۆمینتێوی کۆنته‌ر جه‌ مێژوو مه‌عریفه‌تو پیشالیاری شکه‌ به‌را که‌ کۆنترین ده‌سنووسو کوردین با ئاشکراش که‌را ئیتر با باسو گاتهاو ئاویستای نه‌که‌رو با نه‌گێلمێوه‌ سه‌رو قه‌باڵه‌ نامه‌کاو هه‌ورامانی که‌ ئیجاره‌ی نامه‌ی یه‌ره‌مشا به‌ ئارامی یان هه‌ورامی کۆن نویسیان با باس جه‌ زوانه‌ پاراو و په‌ڕ جه‌ لتافه‌ت و ناسک واچی و   پاکو پۆخته‌که‌و مه‌وله‌وی و سه‌یدی و بیسارانی و خانای قۆبادی و میرزا ئه‌ولقادری پاوه‌یی و ئه‌ڵماسخانی که‌نووله‌یی و ده‌یان گه‌نجینه‌ و که‌ڵه‌ شاعێری ته‌ری نه‌که‌روو !   هیواداره‌نا ویژدانتا چڵاکیۆره‌ و یر جه‌‌ پییت و به‌ره‌که‌ته‌ ئه‌ده‌بی و مه‌عنه‌ویه‌که‌و ده‌ریاو زانستو ره‌بانی و عێرفانی و سه‌روه‌ته‌ ئینسانیه‌‌کاو ‌ته‌کیه‌ و خانه‌قاکاو ته‌ۆێلی و بیارێ و باخه‌کۆن نه‌قشبه‌ندیا که‌ردێوه‌ که‌ گردین به‌شێوه‌ن جه‌ خزمه‌ت و سامانه‌ فه‌رهه‌نگیه‌که‌و ‌ هه‌ورامانی ، به‌ قه‌وڵو فارسا> این کجا و آن کجا ؟ جیاوازی ماچۆ   تا هه‌ورامی ئاسمان و ریسمانه‌ ! داواکاره‌نا پیی کورته‌ باسه‌ هه‌ر وه‌شسیایی و خاوه‌ن رێزێ هه‌ورامی که‌ حۆرمه‌ت جه‌که‌سایه‌تی ۆێ و فه‌رهه‌نگ و ئه‌سڵ و فه‌سڵو وێش گێرۆ و به‌ درێژایی مێژووی به‌ ژیوای په‌ڕ جه‌ نه‌داری و هه‌ژاری و ده‌رده‌داری و سته‌مکاری به‌ فه‌خر وشانازی و به‌ دوور جه‌ ملکه‌چی جه‌ هه‌وڵوو پارێزنای و به‌رده‌وامی زوانو هه‌ورامی بیه‌ن   ئیی پاشێلی و بێ رێزیه‌ فه‌رهه‌نگیه‌ی قه‌بوول نه‌که‌رۆ   چوون جه‌ وه‌راوه‌رو فه‌رهه‌نگو نه‌سڵو ئیسه‌ و ئایه‌نده‌و هه‌ورامانی وه‌رپه‌رسیارێنمێ پێویستا و مشۆ هه‌وڵوو ئیی باند و چه‌ته‌ فه‌رهنگیا بایکۆت و ته‌حریم کریۆ > قاژه‌ سیاوا به‌رکه‌ردی جه‌ باخ،،، شێوندی لانه‌ی قاژی سیاوداخ‌

ئه‌حسه‌ن نه‌قشبه‌ندی

20110118سوید

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Tuesday, 18 January 2011 18:49)