یانه‌ رؤچنه ته‌ڵاقه‌که‌و لالؤ جافری

ته‌ڵاقه‌که‌و لالؤ جافری

"گېڵناۉه‌ و ماچا: وه‌ختو وېش لالؤ جافرو ته‌ۉېڵې(جافرو ڕه‌سوڵو خاڵه‌ی)‌ ته‌ڵاق ۉزؤ وماچؤ "ئینه‌ ته‌ڵاقش بؤ ئارؤ حۆت جارې مه‌رده‌نا و زینده‌ بیه‌ناۉه‌

خه‌به‌رو ئی ته‌ڵاقیه‌  میاۉؤ لا مه‌للا ساحېبی و مه‌ڵڵا ساحېبیچ لالؤ جافری چڕؤ و په‌رسؤش چه‌نه‌  و ماچؤ " ڕاسا  تؤ ته‌ڵاقی چیمنه‌ته‌ ۉسته‌ن؟ ئه‌ر پاسه‌ بؤ ته‌ڵاقت کۆته‌ن، یؤ مه‌تاۉؤ مرؤ و زینده‌ بؤۉه‌، ئادیچ ڕۉېۉ حۆت جارې"

لالؤ جافریچ ماچؤ" قؤربان، ئه‌رې ته‌ڵاقی چیمنه‌مه‌ ۉسته‌ن و ده‌لیلېچم هه‌نې"

مامؤسا ماچؤ" داده‌ی ۉاچه‌ با بزانو؟"

لالؤ جافر ماچؤ" قوربان هه‌رچی زاڕؤڵا وېم ۉینو پاۉرۉێنې و زاڕؤڵې کابرای ۉینو که‌ پؤشتېنې ئانه‌ مرو و زینده‌ بوۆ. هه‌رچی ژه‌نه‌کې وېم ۉینو که‌ جلېش شڕېنې و ژه‌نه‌و هامسایچ ۉینو که‌ هه‌ر ڕۉېۉ ده‌سېۉ که‌رؤنه‌ ئانه‌ مرو زینده‌ بوۆ. هه‌رچی وېم ۉینو که‌ وه‌رو وه‌ره‌تاۉو هامنیۆ و چېرو باریه‌نه‌ قؤڕه‌و له‌مېم مێ و کابرایچ ۉینو ئجؤ تازه‌ پاکه‌ته‌نه‌ به‌ر ئامان و که‌بابخانه‌و بنه‌و سوره‌چناره‌که‌یه‌نه‌ ددانې ماژه‌نؤ، ئانه‌ مرو و هه‌م زینده‌ بوۆ و...."

لالؤ جافر سه‌رو ئی نه‌زمیه‌ به‌رده‌ۉام بؤ تا مامؤسا مێۉه‌ ده‌نگ و ماچؤ" جافر ۉه‌سېن! تؤ ڕاس ماچی و ته‌ڵاقت نه‌کۆته‌ن"

ئینه‌ خاڵانه‌و ئارؤ مه‌ردمو هۆرامانیا. هه‌رچی زۉانه‌که‌یشا ۉینا که‌ کوله‌کې ته‌ڕه‌یچه‌نه‌ بانگش په‌ی مه‌دریؤ و زۉانو تازه‌ په‌نه‌ یاۉاو هامسای ۉینا که‌ یه‌خې گجیش ملو پیای بڕؤ ئانه‌ مرا و زیندې باۉه‌ و هه‌رچی ۉینا که‌ زاڕؤڵېشا جه‌ گرد مه‌دره‌سېۉه‌نه‌ به‌ زؤر زۉانېۉته‌رشا په‌نه‌ موونیؤ و هیچ هه‌رزه‌لېۉه‌یچه‌نه‌  زۉانو ئیدیشا لاش ۉه‌نه‌ مه‌کریؤۉه‌، ئانه‌ هه‌م مرا و زیندې باۉه‌. ئا گرده‌ که‌ناڵه‌ ته‌له‌ۉزیؤنیې و ئا گرده‌ مه‌دره‌سې و ئا گرده‌ .... هه‌رکامه‌ هۆرامی زۉانی ڕۉانه‌ به‌ ده‌یان جارې مرنا و په‌ی مه‌رگېۉته‌ری  زینده‌ش که‌راۉه.

ئیتر هه‌ر با ۉاچمې گرد کوردېنمې و چون یه‌ک به‌رابه‌رېنمې.‌

 

سیامه‌ند هۆرامی

2012-11-07

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌

 
 
 
 
 
 
 
 

Last Updated (Wednesday, 07 November 2012 15:23)