یانه‌ رؤچنه ئایه‌نده‌ت جه‌ ویر بو

ئایه‌نده‌ت جه‌ ویر بو

ئازیزا، دوسا، هامزوانا

ساڵه‌ی تازێ خزمه‌توو گردیتا به‌ هه‌ر په‌یلوا و ڕاوینیه‌ که‌ هه‌نتا و جه‌ هه‌ر کوگه‌و دنیاینه‌ مه‌ژیودێ مواره‌کی ماچوو. ئاواته‌وازه‌نا چی ساڵه‌ تازێنه‌ پیروز و سه‌رکه‌وته‌ته‌ر جه‌ ویه‌رده‌ی گردیما پێوه‌ ته‌لاش بکه‌رمێ نه‌ ته‌نیا په‌ی وێما به‌ڵکوو په‌ی زوان و فه‌رهه‌نگوو هۆرامانی، په‌ی سه‌ر وسته‌یش و سه‌ربه‌رزیش که‌ سه‌ربه‌رزیو گردیمانه‌.

ئی ده‌هه‌  - 1390 ڕوجیاری ، 2010 میلادی-  ده‌هه‌و ئه‌وه‌ژیوای کێبیه‌ی یا هووییه‌توو هۆرامی و هۆرامانین.‌ ساڵه‌ی ویه‌ردێ‌ لاقورێوه‌ گه‌ورێ هورگیریا په‌ی ئی هه‌رمانی که‌ جه‌ ئایه‌نده‌نه‌ ئیژاییش به‌رمه‌گنونه‌. وه‌شبه‌ختانه‌ بنه‌ره‌ت و فونداسیونوو ئاروینوو زوان و فه‌رهه‌نگوو هورامانی مه‌رزیانه‌ره‌ و توه‌ش گێرتێنه‌ و وه‌ره‌ وه‌ره‌ ئی وه‌رێ وه‌ره‌ش گێرتێنه‌و گه‌ورێ بونه‌و که‌م که‌م جه‌موو دڵسوزا و ئاشێقاو ئی ویره‌یه‌ فره‌ته‌ر بونه‌. ئینسان به‌ ئومیدوه‌ن که‌ زیننه‌ن و به‌ ئومیدوو ئانه‌یه‌ تا ئاخروو ئی ده‌هه‌یه‌ جه‌ژنه‌و ئه‌وه‌ژیوای هه‌قه‌تینوو ئی فه‌رهه‌نگه‌یه‌ به‌رمێ راوه‌. ئه‌وه‌ژیوایه‌ که‌ سه‌مه‌رش مه‌شیۆ ویر و ئه‌ندیشه‌یه‌ ئینسانی و ئازادی ته‌ڵه‌ب و به‌رابه‌ری بو. به‌رویروو ئی ڕه‌وتیچه‌ به‌شه‌ری تازه‌ و جامێعه‌ی تازه‌ن. په‌ی ئی هه‌رمانه‌ گه‌ور‌ێ ئینسانی هۆرامی زوان مه‌شیو نه‌ته‌رسانه‌ و به‌ باوڕیه‌ قووڵوه‌، قوڵێ هورماڵوو و به‌ وه‌نه‌وه‌ی و ویچن که‌رده‌ی ویه‌رده‌ی و چه‌مداری ئایه‌نده‌ی به‌ ده‌سپێچه‌کوو ئاوه‌ز و مه‌نتێقی ئا وه‌ربه‌سانه‌ که‌ ئینای وه‌رشه‌نه‌‌ و وه‌روو ئی راینه‌ لاشابه‌رو وزوشا قه‌راخوه‌. به‌ ئاوا‌ته‌و ئانه‌یه‌ گردما لێره‌ و شه‌هامه‌تی فره‌ته‌ر بده‌یمێ خه‌رجه‌ره. په‌ی فره‌ینه‌یما که‌وته‌نوه‌ راسی و سارا که‌ زوان و فه‌رهه‌نگوو هۆرامانی نه‌ ده‌سه‌ڵاتی سیاسی هه‌ن په‌شتیشوه‌ و نه ده‌سه‌لاتی سیاسی‌ کارش په‌ی که‌رونه‌ و نه‌ گلێرگایه‌ش هه‌نه‌ تا هه‌رمانه‌ش په‌ی بکه‌ریو. پی به‌نه‌و و چی ئاژه‌نه‌ ئه‌رکوو راوه‌به‌رده‌ی، وه‌ڵ وسته‌ی، چه‌م پوه‌بیه‌ی و هوش پوه‌وه‌بیه‌و ئی میراسه‌یه‌ هه‌ن سه‌روو شانه‌و دانه‌ دانه‌و هورامی زوانه‌کاوه‌ و ئا که‌سانه‌ که‌ دڵسوز و عه‌لاقه‌مه‌ندوو ئی فه‌رهنگیه‌نی. به‌ ئومیدو ئانه‌ی چی ڕاینه‌ هه‌ر که‌س حه‌نناو وێشوه‌ تا ئا یاگێ که‌ مه‌تاو و به‌ هه‌ر جورێو که‌ په‌یش مه‌کریو و پا جوره‌ که‌ حه‌ز و ته‌وانش موازو، هه‌نگامیه هه‌رچه‌ند وردیه‌یچ بو،‌ هور بگێرو.

دوه‌سه‌د ساڵێ چێوه‌ڵته‌ر هێگێل، فیلسووفی گه‌وره‌ی ئاڵمانی واته‌نش: "هه‌ر که‌س مه‌شیۆ زاڕو زه‌مانه‌و وێش بو". ئایا ئینسانی هۆرامی زوان ئارو زارو زه‌مانه‌ وێشه‌ن؟ ئایا ئینسانی هۆرامی زوان یاوان پانه‌یه‌ که‌ مه‌شیو زارو زه‌مانه‌و وێش بو؟ ئانه‌ تاریخه‌ن که‌ جوابوو ئی داپه‌رسێ مده‌ۆوه.‌ ته‌لاش بکه‌رمێ شه‌رمساروو تاریخی و ئایه‌نده‌ی نه‌بیمێ!

1 نه‌ورێز 1391 روجیاری،20 مارس 2012 میلادی

داریوش ره‌حمانی، مه‌ریوان

This e-mail address is being protected from spambots. You need JavaScript enabled to view it

سه‌رنجې

  • 1) سه‌رنامه‌ش نیا

    Author: یعفوبی

    سلام ده ستا وه ش بو

سه‌رنجېوی تازه‌ بنیه‌ره‌‌