یانه‌ رؤچنه سیۉدۉې ساڵې، سیۉدۉې نۆرؤزې!؟

سیۉدۉې ساڵې، سیۉدۉې نۆرؤزې!؟

سروشت ، نمانای ، ژیوای و ژیوایۆ وێش نه‌ورۆزان به‌ ڕهێڵه‌ واران ، جمای هه‌وره‌کان ، برووسکه‌ ، گرموهۆڕ به‌ به‌رزایی و هه‌یبه‌توو ئاسمانی وزۆ  وه‌رانچه‌م .

ئی وێ نمانایه‌  وه‌رانچه‌موو که‌سیۆ  نمه‌ی ئه‌وه‌ شارای . ئه‌ر به‌ گۆشه‌ نێگای ته‌ر‌ چه‌مش په‌ی وزم ،  به‌ بێ ئی ڕه‌شبه‌ڵه‌کیه‌ زه‌مانده‌و  ژیوای سروشتی بێ مانا مه‌مانۆ.  ئینه‌ گردفێرکاری و به‌ فامێته‌ر  ململانێ په‌ی  ژیوای دڵواز  و سه‌رفه‌رازانه‌یه‌ن. . .

پاسه‌ بۆ   سه‌راوه‌ندو  سرۆشو سروشتی ئانه‌ن که‌ ، سه‌قام، بیه‌ی، و زاو زێ یاسا نه‌ ڤاڕه‌کا خول وارده‌ی  زه‌مانینه‌  مه‌خیزیۆ.

بوونه‌وه‌ره‌کێ ته‌ری جموجۆڵ و سرتوخورتو ئی ڕه‌مزو ڕازیشا حاڵیه‌ن ، په‌وچی هامشان هۆرمێزان په‌ی پێشوازی ڤاڕیا تازه‌کا  ژیوای و هۆرگرته‌ی که‌ڵکی چه‌نه‌شان .

 ئه‌ر تاوێ سۆحی زوو وه‌هارینه‌ گۆشداری جریوه‌ جریوو باڵه‌نده‌ خرۆشیاکا که‌رمێ جه‌زبه‌و  ئا ده‌نگه‌ وه‌شا وێش سرنجو هۆشیمان هایی که‌رۆوه‌ .

هه‌ده‌ردای ده‌م و ساته‌کان هۆرگیرو چه‌نه‌ ویه‌رده‌ی نمه‌زانیۆ.  دس‌شیه‌ی فره‌  جارێ ئه‌وه‌گێڵایش په‌ی نیه‌ن .

32 نه‌ورۆزێ 32 وه‌هارێ چی وه‌ڵته‌ر  تووشوو زمسانێ ڕه‌شئ ئامایمێ . به‌ دڵ ڕه‌قی حه‌ولش دا کوشۆمان . نانا ، ڕاس ته‌ر ئانه‌ن واچوو به‌ هیلاکی کوشۆمان .

زمسانی دڵ ڕه‌ش چامنه‌ گرمناش ملماره‌  هێزو هه‌ناومان چه‌نه‌ بڕیا . تێکێ شیێمێ . فرێمان هازیمان نه‌مه‌نده‌ ، پژگیا و ڕژگیا هه‌ر یۆ ویرش  پاسه‌ پڕچیا  وه‌شه ویسه‌ ‌ گیانی گیانیه‌که‌و  هیزیکه‌و  وێش لا بیی به‌ نامۆ و نه‌یار .

وێ دۆڕنای تا ئا یاگێ سه‌ره‌ش هۆردا  دۆسی گیانی کریا به‌ که‌وڕی قوروانی  وه‌رو پایا دیوه‌زمه‌و  زمسانینه‌ تا به‌شکه‌م غه‌زه‌بش بوونارۆ .

زووی زوو  زمسانه‌ وه‌ڵێنه‌کێ ئاوه‌خته‌ ئێمه‌ ده‌سه‌ملانێ سروشته‌که‌یما بێمێ فره‌ جارێ کۆشا شان به‌ شه‌خته‌ و سه‌رداو سڵه‌وه‌ چێرو هاره‌ ئاساوو ده‌سه‌ڵاتیشانه‌  هاڕامان . په‌وکه‌ی که‌فه‌نی چه‌رمه‌و  زمسانی به‌ باڵامان ورازێنێ ، به‌شکه‌م مات و بێده‌نگمان که‌ران .

جه‌سته‌ی زایف و زه‌بوون ئاسته‌مه‌ن  تاوابۆش وه‌رپه‌نگ سه‌رو ڕاو زاڵمی په‌لامار ده‌ری وه‌ش که‌رۆ.

له‌شی قورس و قایم  پۆشته‌و  په‌رداخ به‌ که‌ره‌سه‌ وه‌ر گیره‌کان ، پاڵ په‌شتی یار ویاوه‌ری سه‌ر راسی ، وه‌ڵێ هه‌ر په‌لامارێنه‌ ئه‌شۆ سه‌ر حه‌ساو کریابۆ .

وه‌ڵێ جمای له‌شکه‌رو زمسانی قه‌دیمێ جاڕشان کێشان " هه‌ر یۆ تفاق و پاشه‌که‌وتی ته‌مام و که‌ماڵش وه‌ر جه‌ گه‌مارۆ  زمسانی نیه‌ن با وێش په‌ی ئه‌و دیمو گریوه‌ی به‌ر که‌رۆ ".

سه‌رهۆردای جه‌ور نمانان دیمه‌نی زه‌رد هۆرگێڵاو ده‌شت وده‌رینه‌ به‌رگنۆ . ئاوه‌خته‌ که‌ گه‌ڵا ئیتر ڕاش مه‌گنۆ سه‌روو بنجه‌و وێشۆ  تواناو ژیوایش په‌نه‌ ڕوه‌وا بینیۆ.

زقمی بێ ئامان گێلای ونی له‌شیش تووشو مدرای که‌رۆ. ئیتر گۆڵ کرده‌ی گوڵه‌باخان ،شیرینی هه‌نجیرا سه‌روداری ، سوری و زه‌ریفی پۆس هه‌ناری ، هیچکام وه‌رگه‌ نمه‌گێران .

 گوله‌ باخ سیس، هه‌نخیری شیرین ڕه‌ش و پۆس هه‌ناری دڵ ونیین ئه‌شقاڕیای سه‌رچلان به‌ش شانه‌ن.

پاییز،ئاماوه‌  [ که‌شکۆڵه‌ که‌و شێخ عه‌بدولمومنی مه‌ردوخی] 

..................‌

ته‌به‌ق ته‌بق هه‌ور سیای دود ته‌م

نه‌م دا سه‌رزه‌مین به‌ سه‌یلات خه‌م

قه‌تره‌،قه‌تر، نه‌رم، هووناو وه‌شته‌وه

جه‌ سه‌د هه‌زار ڕه‌نگ خه‌زان ڕه‌شته‌وه‌‌

خیزیای ئی وه‌یشوومه‌یه‌  هۆش نه‌سپه‌رده‌ی  به‌ مۆچیاری وه‌ڵینان و دڵ سپه‌رده‌ی به‌ وه‌ش خه‌یاڵی ڕمه‌و  مۆسیقاو وارانی وه‌ڵێ له‌شکه‌رو زمسانیه‌ن .

هوروژمو زمسانی نیشانێ وێش کیاستی و هۆشمان نه‌دارانه‌ .

 سروشت وه‌ڵێ مه‌ڕیاو  زمسانی  ده‌لیلی وه‌ش هه‌واڵ وزۆ را تا مزانی ئامای پادشاو نه‌و وه‌هاری  جاڕ دۆ گۆشێ هه‌ر گۆشدارێوه‌ ڕزگاری وازی . [سه‌یدی (1199- 1265 کۆچی]

نه‌ورۆزگوڵ خێزان ، نه‌ورۆز گوڵ خێزان

واده‌ی وه‌هاره‌ن  ، نه‌ورۆزگول خێزان

..........

به‌ڵێ جاڕ چیان نه‌ورۆز جاڕ مه‌دان               

جاڕ  پادشای  نه‌و  وه‌هار   مه‌دان

بادی واده‌ی وه‌شت جه‌ کۆسار مه‌یۆ

یاران   مزانی ، نه‌و  وه‌هار  مه‌یۆ

پادشای وه‌هار واده‌ی وه‌ختشه‌ن

به‌ ته‌عجیل مه‌یۆ، ئامای جه‌ختشه‌ن

وه‌خته‌ن شای وه‌هار بنیشۆ نه‌ده‌ور

جاڕ بکێشۆ ڕه‌عد ته‌مه‌لوول و هه‌ور

وه‌خته‌ن بگێرۆ ڕووی ده‌شتو سارا

که‌وکه‌به‌ی وه‌هار وێنه‌ی شای (دارا) ...

با کۆشم ده‌نگی ئه‌رێنی وێمان وزم سه‌رو یۆی و فێر کاری وانه‌ نرخداره‌کا  سروشتی که‌رم به‌ چراوی شه‌وه‌تاریکه‌کاو 32 ساڵێ زمسانی تووش و په‌ڕ ئازاریمان په‌ی هۆر ئێزناو  قه‌واقوو  ڕه‌مناو هه‌ر ده‌سه‌ڵاتێ زمسان ڕه‌وشتی .

32 ساڵێن من‌ چه‌نی گرمه‌و هه‌ورو  هه‌ر وه‌هارێ جه‌سته‌ی سه‌ردا به‌رده‌م سه‌ر جه‌نۆ چڵــه‌کیۆره‌ ، دیسان ماته‌م له‌شم پۆژنۆ ، خه‌مێ که‌ڵه‌که‌ بییێ هه‌مدیس سه‌رواز که‌را .  ئاواته‌  سه‌رگه‌ردانه‌کێم هه‌راسان و ئۆقره‌ بڕیا ئی سه‌ر و ئه‌وسه‌رو ویریمه‌نه‌ هه‌زاره‌شانه‌ن گنۆنه‌ به‌شکه‌م هه‌لاهه‌لایی  ده‌ماره‌کا له‌شیم ساو په‌ناو گه‌رماو ئایرو نه‌ورۆزینه‌ چه‌نی تێکه‌ڵی پێخامه‌ وه‌هاریه‌که‌یش پاڵو گوله‌ نه‌ورۆزه‌ی مزانی وازه‌ ینه‌ قرمه‌و هانه‌ چه‌ما بۆ به‌ سه‌ڵاو هۆر چڵه‌کنایماپه‌ی هۆرکه‌نه‌و کۆڵه‌کێ جه‌وری ، په‌ی که‌لاو وسته‌ی سه‌روو ڕاو  ئا لافاوێ  هێزو توانامانش جه‌ یۆتری ترازنا ، به‌شکه‌م ته‌ماشا که‌رده‌ی سه‌فه‌و گۆرالا وزۆماوه ‌ ویرۆ یۆ وسته‌ی سه‌فه‌ ترازیاکانمان .

ئــالـــــمان    -    سدێق  بابایی       04.03.2012

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌