یانه‌

په‌یلوایێوی ده‌روونشناسانه‌ سه‌روو کتێبوو " نامه‌ نویسته‌ی به‌ زوانی هۆرامی

بڕێ وه‌خت مه‌نه‌ناره‌ و ده‌سپاچه‌ییم پۆوه‌ دیار بیه‌ن په‌ی تێکستێوی فره‌ کۆتای هۆرامی. په‌ی سه‌روه‌شیدای یا خێرئامای که‌رده‌ی و پیرۆزبایه‌وه‌ فره‌ ساکار و ساده‌و نه‌ورۆزی یا ره‌مه‌زانی، گر جاریو جه‌ شێعره‌و شاعێره‌ پایه‌به‌رزه‌کا که‌ مه‌ژگمه‌نه‌ مه‌نه‌بێنێوه‌ و وه‌رم که‌ردێبێنێ که‌ڵک هۆرگێرێنێ.

بڕێوه‌شا دووباره‌کاری و تێکراری بێنێ و داییم ئا مه‌ته‌ڵه‌ مه‌شهوورێمه‌ گنێوه‌ وێر که‌ باسوو قه‌بێح بیه‌ی قسه‌ تێکراری که‌رۆ هه‌رچه‌ند فه‌سێحێچ بۆ. فره‌ به‌ وه‌شحاڵیه‌وه‌ به‌ش به‌ حاڵوو وێم تاوو واچوو چی وه‌خته‌نه‌ گه‌نجینه‌وه‌ جه‌ گه‌نجینه‌کاو کتێبخانه‌و فه‌رهه‌نگ و ئه‌ده‌بوو کوردی به‌ گردی و ئه‌ده‌بوو هۆرامانی به‌ تایبه‌تی به‌ زوانی هۆرامی و به‌ قه‌ڵه‌موو کاکه‌ محه‌مه‌دی مسته‌فازاده‌ی ئاما بازار و کتێبخانه‌و هۆرامانیش ده‌وڵه‌مه‌ن و ره‌نگین که‌رده‌نه‌و. منیچ دماو وانایه‌و ئا کتێبه‌یه‌  پاسمه‌ به‌ خاس زانا بێده‌نگ لاشه‌نه‌ نه‌ویه‌روو و سه‌روو ئی گه‌نجینه‌یه‌ به‌ قه‌ڵه‌مه‌ که‌م ره‌نگه‌که‌و وێم جه‌ راوینوو ده‌روونشانسی و بێهداشتیوه‌‌ چن سه‌ترێو سه‌روو ئی کتێبه‌یه‌ بنویسوو.

وڵتر ماچۆ: ئه‌گه‌ر گه‌ره‌کتانه‌ چنی من قسێ که‌ردێ وانه‌کاتا بژناسدی و ده‌سچینشا که‌ردێ. خولقنای و بیه‌ی مه‌تنێوی ئه‌ده‌بی و فه‌رهه‌نگی یان زانیاری به‌رز و سه‌رنج ره‌کێش جه‌ هه‌ر زوانێوه‌نه‌ بنچینه‌ و فونداسیونێوی پته‌وا  په‌ی سه‌نگین که‌رده‌ی ئێژایی و وه‌زنوو ئا زوانه‌یه‌. ئی هه‌رمانانه‌ جه‌ ویه‌روو ده‌روونشاسینه‌ مه‌یدانه‌وه‌ گه‌وره‌ن په‌ی به‌رزوه‌که‌رده‌ی و گه‌شه‌دای روحوو ئازایه‌تی ئا زوانه‌یه‌ که‌ تا ئاوه‌خته‌ کونج و گوشه‌و وه‌ڵاتینه‌ کزش که‌رده‌ن و به‌ ده‌لایێلی کۆمه‌ڵایه‌تی، سیاسی و فه‌رهه‌نگی سه‌رکوت و گه‌ره‌شێل کریان و شاریانه‌وه‌.

زوان په‌دیده‌‌ و خه‌ڵاته‌وه‌ن بێ وێنه‌ په‌ی په‌روه‌رده‌ که‌رده‌و رۆح و گیانوو ئینسانی. سیماکاو ئه‌ده‌بوو هه‌ر زوانێوه‌ هامیانا په‌ی گرسای رۆح و جه‌سه‌ی. ئه‌گه‌ر زوان ئی ئامرازێشه‌ نه‌با ئینسانه‌کا یۆوه‌ په‌یوه‌ن و‌ قه‌ڵه‌مه‌ نمه‌که‌را و چانه‌یچه‌ زیاته‌ر بۆ به‌ ده‌لیلێو پژگیای و هۆرڕشکیای کۆمه‌ڵگایێوی که‌ ئادێش لکنانێ یۆوه‌ و به‌وجوودش ئاردێنی. زوان ئامرازێوه‌ن په‌ی گه‌شه‌که‌رده‌و ده‌سه‌ڵاتی سیاسی، ئابووری و فه‌رهه‌نگی هه‌ر نه‌ته‌ویوه‌.

ژان پۆل سارتر ماچۆ: به‌ گومانم جه‌ روه‌و ته‌مبه‌ڵی و ته‌نه‌له‌شی ئینسانه‌کان دنیا روێوه‌ش جه‌ روێوه‌ته‌ریش مشۆ! . جیاوازیاو دنیای، سه‌مه‌روو ته‌لاش و ته‌قالا زاتوو ئاده‌میزادین به‌ تایبه‌ت ئه‌گه‌ر ئا ته‌لاشه‌ په‌ی گه‌شه‌که‌رده‌ی باری فکری و به‌رزوه ‌که‌رده‌وو زوان، ئه‌ده‌ب و کولتوورو تایبه‌توو وێش بۆ. زوان موهه‌ندێسی و ئه‌ندازیاریه‌وه‌ جاویدان و ئه‌وه‌مه‌نه‌ن که‌ ئه‌گه‌ر پاریزگاری پته‌وش چه‌نه‌ کریۆ نه‌ته‌نیا دلێنه‌ نمه‌شۆ و نمه‌فوتیۆ به‌ڵکوو سه‌ڵامه‌تی ڕوحی و جه‌سته‌یی کۆمه‌ڵگای و ئینسانه‌کا پارێزنۆ و گه‌شه‌ش په‌نه‌ مدۆ.

کوڵ‌ و وه‌رته‌سک جه‌ چن خاڵێنه‌ به‌ پاو په‌یلواو ده‌روونشناسی و بێهداشتی،‌ خاڵه‌ ئه‌رێنیه‌کاو ئی کتێبه‌یه‌ وزوو وه‌روو چه‌ما:

یه‌کوم: هه‌ست و ئیحساسێوه‌ ناسک و وه‌رچه‌م دلێ تێکستەکینە‌ دیارا کە نویسەرو ئی کتێبی سەرنجش دان پەنە.

دووه‌م: تکنیکوو قسه‌که‌رده‌ی به‌ زوانی هۆرامی جه‌ ئاستێوی نزمم‌ به‌رۆ په‌ی ئاستیوی به‌رزی.

یه‌روم: رۆحوو وانه‌ری گه‌وره‌ که‌رۆوه‌.

چواروم: جه‌ ڕاوینوو بێهداشت، ساقی و سڵامه‌تیوه‌ ده‌روونوو وانه‌ری به‌رز که‌رۆوه‌.

په‌نجوم: زوانوو وانه‌ری ره‌وان و گه‌ردان که‌رۆ و حێسوو متمانه‌ی به‌رۆ سه‌روه‌.

ششوم: مه‌ژگوو وانه‌ری ئاماده‌باش مدۆ په‌ی په‌روه‌رده‌که‌رده‌و نه‌سڵ و ره‌گه‌زوو دماو وێش.

حه‌وتوم: پاڵپشت و کۆڵه‌کێوه‌ن په‌ی موحکه‌م و هێقم که‌رده‌ی یانه‌و ئه‌ده‌بیاتوو هۆرامانی.

هه‌شتوم: پردێوه‌ پته‌و و په‌یوه‌ندی دارا‌ په‌ی یانه‌ جیاجیاکاو زوانه ‌کوردیه‌کا.

مه‌ریوان. زمسانو 1390 ی رۆجیاری.

بورهان ئه‌خته‌ر

 

سه‌رنجې

No Comments, be the first to Comment

سه‌رنجېوی تازه‌ بنیه‌ره‌‌