هاموهڵاتیه وهشهؤیسا بهروو وهڵاتی

خهموهرهکا هۆرامانی

ههر پاسه که ئاگاداریندی ئینه ماؤیؤی دوور و دریژا که چیگه و چاگه و به تایبهت سهروو توڕهو ئینتیرنیتیۆ و یانهو هۆرامانوو پاڵتاڵکیهنه گلیری بیمیؤه و باسی و دهرد دڵی کهرمی. چی ماؤهنه پهی گردیما به خاسی بهر کۆتهن که ویری و پهی لؤایی سیاسیی و دین و مهزههبی جوراو جوریما ههنی و فرهو جارا سهروو باساما ههنترینما نگران کهردهن. پهیما بهر کۆتهن که ئهندامی گردوو سازمانه سیاسیه کوردیهکا دلیمانه ههنی و یاؤێنمیچهنه که بازیؤما به ڕاسی و به دڵ ئینێ چهنی سازمانهکاشا، گاههن کیشی سازمانهکایچما ئاردینینه دلی یانه ئینترنیتیهکاما و ههر به پهی لؤایه سیاسی و ئیدیلوژی سازمانهکا دڵ و دهروونوو یوترینیما پیکان.

کهچی سهرهڕاو گردوو ئا جیاؤازیا و نا تهباییا، تا به ئارویچ ههر ئینایمی پیؤهره. دیارا ئی وهختیچما ههر به باس نهؤیاران، بهڵکوو وی پهرؤهریچ جه باسهکانه بیهن و به کردهؤهیچ چند ههنگامی خاسیما هورگرتینی. چانیشا نامهکهما پهی پهرلهمانی و پاریزگاریما جه چند کهسایهتیه سیاسیا.

ههر پاسه که ئاماژهم دا پهنه سهرهڕاو گردوو ناتهباییهکاما چیؤیؤی ههر پاڵ نیێنمی پۆ تا دۆروو یویهنه بیمی. ئهؤیست مهکهرو به وردی سهرنج بدهیمی تا پهیما بهر گنو که به ڕاسی ئانه نهدینی و نه ؤیری و نه پیؤهنیی سیاسیی بیینی که گلیریشا کهردینمێ. بهڵکوو نامی هۆرامانی و وابهستهگیما به هۆرامانی و زؤانی هۆرامی بیهن. زؤانیؤ که باروو کولتووریؤی ڕهنگین و سهنگینی ئینا سهروو شاناشۆ.

فرهو جارا باسما کهردهن که هۆرامانوو ئاروی هیلاکا. بهشیؤی فره جه شار و دهگاکاش ؤیرانا و خهڵکهکهش ئاؤارهن. مڵکداری وهزعهش خرابیێنه و گوزهران مهدو. بیکاری و گرانی ئینێ رادهو بهرزوو ویشانه و خهڵک شونهو گوزهرانیهره دهر بهدهرا. پاڵوو ئینیشایچهنه زؤانهکهما تیر واردهن و رؤهکیش مژماریا، فهرههنگهکهما ماچی ؤهرؤهو وهروو ؤهرهتاؤوو هامنی. بی مهسکهنی و بی دهرمانیچ ههرا کهرا و.....

گردیچاما به یاگی ویما نگرانی بیینمی و گهرهکما بیهن كاریؤ کهرمی. بهشی فرهیچما سهره بهرشیی سیاسهتیهنمی و زانانما که کاری جهمی و سازمانی کاراتهرا و پهی ئانهیچه به دهیان جاری گلیری بیینمێ و سهروو پیشنیارا و ئهساسناما باسیما کهردینی. بهڵام تا به ئارو هیچ باریؤما به ههؤار نهیاؤان .

پیشنیارهکیما ههر به پاو پهیلؤایه باؤهکا کوردستانی بیینی و ئاکامیچ ئانه که ههر ئیده و مهرام چند کهسیؤ ڕازی کهرو. کهچی ئیمه ههمیشه وازیاری ئانهیه بیینمی تا لانی کهم بهشی فرهما بتاؤمی پیؤهره بیمی.

جا پهی ئانهیه بتاؤمی گردما، یا لانی کهم بهشی فرهما، پیؤهره بیمی به ناچار و مشیو تهکیهما ههر سهروو ئا چیؤا بو که ئانا تا ئیسه گلیریشا کهردینمێ، یانی هۆرامان و گرفتهکی هۆرامانی، و کاسیؤی سازمانی چامنه هورچنمی که دهرهتانوو پیؤره بیهیما بدو پهنه، یانی ههرپاسه که بیینمی و ههنمی، و یاسا و ریساییؤ هۆرچنمی که تا ئیسه بهینمانه بیینی، یانی پرنسیپه دیموکراتهکی و مافهکا مروؤی.

به زؤانیؤتهر کهرو پانهیه، ههرپاسه که ههنمی ویما سازمان بدهیمی و به پاو پرنسیپه دیموکراتیهکا چهنی یوی هورس و کۆت کهرمی و ڕا چارههاییؤ پهی گرفتهکاما هورچنمی که زیاتهر ڕنگ و بو ویما پۆشاؤه بو و پهی لؤا و ڕاچاری سازمانهکاتهری بازمیؤه پهی ویشا.

من ئانا چینه و پی بوناؤه پیشنیاروو کوؤیؤی کهروو که وهختوو ویش گریکهکا دهس پهی بهردهن و لا ئیمهیچۆ بیهن(مهره). مهبهستم چا کویه کونگریؤا جه گردیما( ئانیما که گهرهکمانه)،.

دوختوو جهسه و ئاخنوو کونگرهی: ا_ ئی کونگره جه گردیما وهش بو( دیارا ئانیما که گهرهکمانه). ب_ کونگره باڵاتهرین ئورگانی دهسهڵاتدارا. پ_ نشهستی کونگرهی به جهمۆ بیهی دؤی جه یهری دهرسهدوو ئهنداما رهسمیهت پیدا کهرو. ت_ کۆنگره ئهندامی تازی پهزیرو و ئهندامیچ بهر کهرو. ج_ کونگره مشیو جه وهختی دیاریهنه نشهستی ویش گیرو.ح_ کونگره گرفتهکا و دهردهکا هۆرامانی تاؤ و توو کهرو بڕیارشا سهر مدو. د_ کونگره کومیتی پهی ؤهرۆ بهردهی و جی به جی کهردهی ههرمانهکا دیاریی کهرو و هورچنو. ر_ کومیتهکی ؤهراؤهروو کونگرهیۆ مشیو جواب گوی با. س_ جه ههر نشهستیؤوو کونگرهیهنه کونگره ئهر زاناش ههرمانهو کومیتهکا وهش ملو ؤهرۆ، متاؤو بازوشاؤه، ئهندا متاؤوو جوابشا کهرو و فاڕوشا. کونگره ئهژمارداری(حهسابداری) دیاریی کهرو و سهرپهرهستی دارایهکا ویش کهرو.

1_ نامی ئی کونگرهیه( مهره، خرابه نیهنه)

2_ ههدهف_

ئی کونگره کونگریؤی سهر به وین و وابهسته به هیچ مهزههب و سازمانیؤی سیاسی نیا. باؤهرش به مافهکا مروؤی ههن و جه چوارچیؤهو پرنسیپه دیموکراتیکهکانه هورس و کۆت کهرو. کونگره به پاو نیاز و دهرد و گرفتهکا هۆرامانی، ههرمانی پهی ویش منیوره( ئینه چامای به وردی کریو باس کریو)

3_قهرارگا_ کریو باسش کریو( ئانه که یاگی کونگرهی کوگه بو)

4_ ئهندامهتی_ ههرکهس که پهی ههدهفهکا کونگرهی ههرمانه کهرو و مزهو ئهندامهتی بدو، پهیش ههن بو به ئهندام( کونگره بریارش سهر مدو). ئهندامیؤ که مزهو ئهندامهتی نهدو و یا بهجوریؤ جه جورهکا دژایهتی ههرمانا کونگرهی کهرو، کریو بهر کریو. بهر کهردهی ئینا دهسوو کونگرهیهنه.

5_ جهمه گردیهکی کونگرهی( ساڵانی و مانگانی کریو باس کریا).

6_ ساڵهی ماڵیه مشیو ساڵهی روجیاریه بو.

7_ ؤاڕای ئهساسنامهی_ ئهساسنامهی پهسهند کریا به بریاروو دؤی جهما کونگرهی ئیجا کریو فاریو. ئا دوه جهمیچه مشیو مانگیؤ بهینشا بو. پهی ئی بریاریچه دهنگوو بهشی دیاری فرهینهی ئهویستا، یانی یهری چوارهموو دهنگا.

8_ هورۆ رووشکنای کونگرهی دؤی جهمی گردییش گهرهکینی که لانی کهم مانگیؤشا بهین بو. وهختوو هورۆ روشکیای ئهنجمهنی، مشیو دارایی ئهنجمهنی بدریو به یاگیؤی گردی هۆرامانی( کریو باس کریو)

سیامهند هۆرامی

Piran_h@hotmail.com

20080530 یوتوبوری